Salmon ibn Omir roziyallohu anhu Nabiy sollallohu alayhi vasallamdan rivoyat qiladi: “Sizlardan kimki iftorlik qilsa, xurmo bilan ogʻiz ochsin, chunki u barakadir. Agar xurmo topa olmasa, suv bilan (ochsin), zero suv oʻta pok va tozadir” (Abu Dovud, Termiziy va Ibn Moja rivoyati).

Bu hadisda Rasululloh sollallohu alayhi vasallam oʻz ummatlariga xurmoning fazilatlari haqida xabar bermoqdalar, yaʼni xurmo, avvalo xushtaʼm boʻlib, har qanday odam uchun sevimli ozuqadir. U miya faoliyatini yaxshilab, kishiga koʻp miqdorda quvvat bagʻishlaydi. Suv esa, meʼda sustligining oldini oladi, ishtahani ochadi va kishining sogʻligini tiklab, oshqozon-ichak faoliyatini yaxshilaydi

nas ibn Molik roziyallohu anhu rivoyat qiladi: “Rasululloh sollallohu alayhi vasallam (shom) namozini oʻqimasdan avval bir necha xoʻl xurmo bilan, agar xurmo xoʻl boʻlmasa, xurmo qoqisi bilan, agar u ham boʻlmasa, bir necha xoʻplam suv bilan ogʻiz ochar edilar” (Abu Dovud va Termiziy rivoyati).

Abu Yaʼloning rivoyat qilishicha, Nabiy sollallohu alayhi vasallam uch dona xurmo yoki olov tegmagan biron narsa bilan ogʻiz ochishni yaxshi koʻrar edilar.

“Olov tegmagan narsa” – olovda pishirilmagan yoki suvda qaynatilmagan maʼnolarini beradi.

Ogʻiz ochishda birdan ovqat yoki shunga oʻxshash narsalardan emas, balki meva (xurmo, anjir, olma, uzum...) yoki suv bilan ochilsa, maqsadga muvofiq boʻladi. Chunki bu inson salomatligi uchun ham muhim hisoblanadi.

Demak, biz Rasululloh sollallohu alayhi va sallamning sunnatlariga amal qilib, agar imkoni boʻlsa xurmo, boʻlmasa, suv bilan ogʻiz ochsak, ham sogʻligʻimizni tiklagan va ham koʻplab ajr-savobga erishgan boʻlamiz.

Odilxon qori Yunusxon oʻgʻli

Manba muslimuz