27-mart kuni Oʻzbekistonning Kuala-Lumpur shahridagi elchixonamiz Malayziya Yutara universiteti bilan hamkorlikda Oʻzbekistonning iqtisodiy, sarmoyaviy, taʼlim va turizm salohiyati bagʻishlangan qoʻshma tadbir oʻtkazildi. Unda Malayziya oliy taʼlim vaziri Mohamed Xalid Nordin, Yutara universiteti rektori vazifasini bajaruvchi Shahimi Moxtar, ushbu davlat siyosiy, ilmiy-akademik va ishbilarmon doiralari hamda OAV vakillari ishtirok etdi. Bu haqda “Dunyo” axborot agentligi xabar bermoqda.

Tadbirda Oʻzbekistonda olib borilayotgan keng koʻlamli ishlar, Oʻzbekiston va Malayziya oʻrtasidagi hamkorlikning hozirgi holati va istiqbollari boʻyicha batafsil axborot berildi.
Shuningdek, uchrashuvda Yutara universiteti rektori vazifasini bajaruvchi Shahimi Moxtar Oʻzbekiston Bank-moliya akademiyasi (BMA) bilan islom moliyasi boʻyicha mutaxassislarni tayyorlash sohasida oʻrnatilgan hamkorlikni olqishladi va ushbu aloqalarni kelajakda yanada kengaytirishga qiziqish bildirdi.
Tadbir davomida Malayziya Yutara universiteti qoshidagi Islom biznes maktabi 10 kunlik maxsus islom moliyasi boʻyicha oʻquv kurslarini muvaffaqiyatli tugatgan 21 ta BMA tinglovchilariga tegishli sertifikatlar topshirildi. Shuni taʼkidlab oʻtish kerakki, joriy yilning boshidan jami boʻlib respublikaning 42 ta mutaxassislari Malayziyada islom moliyasi boʻyicha malakasini oshirdi.
Malayziya Yutara universitetining Islom biznes maktabi 2011-yilda tashkil etilgan boʻlib, u dunyoda birinchi boʻlib Universitetlar qoshidagi biznes maktablarni rivojlantirish xalqaro assosiatsiyasi (Association to Advance Collegiate Schools of Business) tomonidan roʻyxatga olingan Islom biznes maktabi hisoblanadi.
Tadbir yakunida joriy yil iyun oyida Malayziya Yutara universiteti huzuridagi Islom biznes maktabi delegatsiyasining Oʻzbekistonga tashrifini amalga oshirish va respublika mutaxassislari uchun seminar hamda treninglar oʻtkazish boʻyicha kelishuvlarga erishildi.

Oʻzbekiston musulmonlari idorasi Matbuot xizmati

Manba muslim.uz