Адлия вазири яқин тарихдаги диний эркинликларни чеклаш билан боғлиқ муаммолар ҳақида тўхталди.
Muallif: . .
Sana: 19.02.2021
499

Адлия вазири Русланбек Давлетов ОАВ билан очиқ мулоқотда фуқароларнинг диний ҳуқуқ ва эркинликларини таъминлаш борасида амалга оширилаётган ишлар ҳақида ҳисобот берди. Вазир яқин ўтмишда диний эркинликларни чеклаш билан боғлиқ ҳолатларга ҳам тўхталиб, бугунги кунда бундай муаммолар йўқлигини айтиб ўтди.

«Виждон эркинлиги, диний эркинликлар бўйича Ўзбекистоннинг ютуқларини эътироф этишимиз керак. Шу ўринда бир тенденцияга тўхталиб ўтмоқчиман. Бизда 2100та исломий ташкилот, исломий бўлмаган 191та диний ташкилот бор. Бошқа динларга эътиқод қиладиган диний озчиликка мансублар сони 1,5 миллионга етади. Улар ҳам Ўзбекистон фуқаролари.

Виждон эркинлиги нафақат ислом дини билан боғлиқ бўлган ҳуқуқларни, балки исломий бўлмаган қатламнинг ҳуқуқларини ҳам таъминлашни англатади ва бу – давлат сифатида олдимизда турган энг катта вазифалардан биттаси. Чунки виждон эркинлиги ҳуқуқи бу конституция бўйича ҳамма фуқароларга берилган.

Битта рақамни айтаман: Ўзбекистоннинг 4000 нафар фуқароси – исломий бўлмаган диний ташкилотлар аъзоси. Ёки кўпларининг умуман динга бўлган муносабати бошқача, йўқ ҳеч қанақа муносабат. Тўғри, бу нарса биз ўзбекларга ёқмаслиги мумкин, лекин бу – тўғридан-тўғри қонунда ёзилган кафолат. Шунинг учун Адлия вазирлиги сифатида ҳуқуқий нуқтайи назардан айтишимиз керакки, битта диннинг иккинчи динга нисбатан ҳеч қандай адовати бўлмаслиги керак.

Бизда миссионерлик фаолияти, прозелитизм бежиз тақиқланмаган. Нима учун бундай қилинган? Биринчидан, бу диний бағрикенглик, толерантлик бўлиши учун қилинган. Иккинчидан, кимнингдир диний қарашларини иккинчи одамга тазйиқ орқали сингдиришига умуман йўл қўйилмайди ва давлат сифатида биз буни таъминлаб беришимиз керак. Чунки чет элликлар ҳам ўзаро суҳбатларимизда шу ҳақда айтишади.

Ўзбекистон халқининг 90 фоизи мусулмон, мусулмонларнинг диний ҳақ-ҳуқуқларини таъминлаш бўйича кўплаб эркинликлар берилди. Биласизлар, «ибодат либоси» деб қанча чалкашликларга йўл қўйилганди, [рўмол ёки ҳижобда] жамоат жойида юриш бўйича қандай муаммолар бор эди, маъмурий жавобгарликка тортиларди... Ҳозир булар кўпчиликнинг эсидан чиқиб кетган, лекин яқин тарихимизда шу муаммоларнинг барчаси бор эди. Бугун бу муаммолар йўқ.

Шу билан бирга, бошқа йўналишларда ҳам биз умуман дунёвий давлат нуқтайи назаридан ана шу ҳуқуқларни таъминлаб беришимиз шарт ва албатта Адлия вазирлиги мана шу дунёвийлик принципи бўйича ҳар бир шахснинг диний ҳуқуқларини, шахсий ҳуқуқ ва эркинликларини таъминлаш бўйича ишларини давом эттиради», – дея Русланбек Давлетовнинг сўзларини келтирмоқда Kun.uz мухбири.

Баралла янграётган азон овози ва йўқотилган «қора рўйхатлар» – Шавкат Мирзиёев диний соҳада қандай эркинликларни қайтарди?

Ўзбекистон диний эркинлик бўйича АҚШ «қора рўйхати»га қандай қилиб кириб қолган эди?

Очиқ мулоқот давомида «Нодавлат нотижорат ташкилотлари тўғрисида»ги кодекс ишлаб чиқилаётгани маълум қилинди.

«383та нодавлат нотижорат ташкилотини давлат рўйхатидан ўтказдик, 714таси қайта рўйхатдан ўтказилди. «Нодавлат нотижорат ташкилотлари тўғрисида»ги янги кодексимиз ишлаб чиқилган бўлиб, уни айни пайтда вазирликлар билан бирга такомиллаштиряпмиз. Шу боис, уни ҳукуматга тақдим қила олмаяпмиз, чунки ичида жуда катта масалалар бор. Ҳужжат юзасидан чет эллик ҳамкорларимиз ўз фикрларини билдиришган. Йил охиригача уни албатта тақдим қиламиз», дейди вазир.

https://kun.uz/79667412

. .